uzluga.ru
добавить свой файл

ЙОЛОН СЫХАН



Дастядя отяш – дастядя кыляш.

Хун боме ляш бябай.

Одям де сяй ныпыйо, лынги ьяди языни.

Щавзя зымсони лц бя зямини гыней – вош бявой.

Беованди чяшядя нур ябыни.

Беовандя одям кеки тисбирядяй – шявядя да кяря бязандей, щеъоян бявотей: - “Бесоня жоным вай”!

Щар кяс бяпе ыштя зу вышкия шяля ъитоно дяшу.

Беованд бящябынуз бябей.

Беованд тикя ьяди языни.

Беованд овж якяни.

Чанядя де хяймандя одями яйшт-нышт быкош, янядя хяй бявиндеш.

Беовандику дийяро бынявиш.

Беованди дамя кардеядя чяй няфяс одями бясутей.

Шартукя суф бя ови сявони, одямя суф бя рящбярон нез бябей.

Рыки бя мол-давляти зийоныш бябей.

Щуля иглян бя са мянот быбу, яй лу быкя бящя, сефи са гылян бя и мянот быбу, яй де луй бящя.

Дядя кядяш кам чяшыш кардябе, асбисян тикяй чяш быкя.

Ня “но” зынедя, ня “хяряшо”.

… бя Гянжя, нати бя Боку.

Йоля одями йоля дардыш бябей.

Боямон – кисямон жо.

Кыты кядя ни, моря дяшя бя дасти-по.

Бя лойшон воте, быши ян чокя пяряндя бийя, ше ыштя баляш варде.

Вяшийя каг щанядя чиня бявиндей.

Фярзянди бевяжи кыште ябыни.

**********

МЯДО ЛЯТИФОН




ВАЙ, ФЯРМОНИ КУМЯ СУТЯ!..


Мядо “Коря обя” куъядя Коря Ябыл номядя гыляй мерд щесте. Шяви гыляйядя Ябыли щамсийя Фярмони кумя сутедя. Бя шифери тып-тыпи сядо де чы щамсийя дий одямон хябядо бедян, омейдян бя комяг. Яммо, ня Коря Ябыл, нян чяй ъен янядя щангомякушон хябя бедяни.

Машки субядя Коря Ябыл евойдя бя со, вязйяти виндя. Ряйря ыштя ъени сядо кардя, бяй вотедя:

- Киня, вай, Фярмони кумя сутя!!!

*********

БЯМЫШ ВОТЯНИ!..


Мядо Ленясе мязядя пеш дывени мердон шартукя дарзон бя кяля ярябон ъяйдянбян, вардянбян бя хямянжо. Сятолла маму кяля ярябяся дарзи сяйдяйбян, бо ъяйдяйбян. Ибердямядя чяй гийяряь бино кардя дяъе. Яве рост бедя, ыштя гийяряьи гятедя, вотедя:

- Зя, аз гийяряьядя нохяшимбян, я кофири киня маштя-маштя бямыш вотяни!

***************

БАЛАХАНЯ МАМУ СЫВОЛ



Мядоядя Балахан номядя гыляй мерд мяжлисядя Яли Ахунику хябя сяйдя ки, бяс, бя дынйоядя одями щях-щисоби ряйон-ряйон бякан, йа щяммяй и вырядя бябен?

Ахунд вотедя: - Яйо ряйон ябыни. Хялляьи-алямиро тявутыш ни ки, ки, чы кон ряйони одяме.

Балаханя маму вотедя: - Бявядя бомыно ряхе ни! Мы Ланкони щямомядя гыляй ахундым бяня хуги куйяме!

**************

ОП, ЧЫ НЫЬЫЛЕЙ!..



Мядоядя “Сяфяря нясыл” номядя гыляй тойфя щесте. Явон дештя зяьяряти ве йоля номшон бекардя.

Руъон гыляйядя жывонон гырдя бедян бя ивря, шедян бо дяныште. Сяфяря няслядя бя Бахшяли номядя гыляй зоя иккярямядя бино кардя бя ов ешей-бешей.. Щямрон бя ся дяшедянин ки. яв бочи ъыго кардедя. Бахшяли ща еше-бешеядя вотедя: - Оп, чы ныьылей! Мявотбян, яв тяседяйбян, янжях зяьярятику вотедяни “тяседям”, щеъо вотедя: - “Оп, чы ныьылей”!..

*********

МЫНЯН ПИЙМ ВАРДЕ, ПИЙ!..



Пеш мущарибя Мядоядя мяхлоьи вени шедя бя Урсийят ьязянжи думо. Зымыстонядя щяммя огардян де кали пули, оляти омейдян бяштя кя. Мещцб номядя гыляй мерд тяйли-тяйли яйштдя омейдя. Мяхлоь чяйку хябя сяйдя ки, Мещцб, ты чичы варде? Яв дасти еккуйедя ыштя лузися, вотедя:

- Мынян пийм варде, пий!..

*********


ФАТМЯ НЯНЯ ФОЛКЛОРИ БОХЧЯ



Хыдо рящмят быкя няня, яв боямяно ве сыханон гяп яъяни, ве сырон ошко якяй. Явоти, баля, ещаня ым Сявет щукмят омя бянябяй, чямя руъгор ве чок дяяварди. Бочи? – Бячяй горя ки, чямя ве зумандя, тывохя одямон дидяргин бин, бешин чямя мящоло… Ячяй вотяйонку ъыго мялум яби ки, сявети бя толыши фолклорийян дыъдя тон, дыъдя зярбя ъяше…

Ын гяпон ъяй-ъяй яв боямяно арядя ве шееронян явотий. Чымы йодядя мандяйонядя гыляй ыме ки, толыши чы голыши (явон бя вахтон бяштя ся сыя кыло яняйнбян) ийяндыку ъыго фярьыш бя:


Тятур-тятур –

Ангивиня шон.

Киня мядя –

Бя толышон.

Толышон

Тук бякан

Киня боло

Рук бякан.

Киня быдя

Бя ся кыло.

Бынышт, бящя

Мыфтя пыло.


Няня ве толышя мащнеон языни. Чявонядя кали гылон еся бя йод вардям. Тясуф быбу ки, чявон вейни чымы йодо бешян. Нянян бяъи ни ки, сянибясятон явони боямя бывото.

Аз ъыго фамедям ки. чямя толышя балялийон ын нывыштяйонян бащандон, шо бябен, бя няня руфиян рящмят бявотен. Чя мащнеонядя гыляй ъыгойе:


Яьяли бяг: Аз тыни бявардем,

Кубря ханым. –

Ханым бякардем.

Кубря ханым: Мыни чич кардяш?

Сядя кячялим.

Бякоря бардедяш?

Лынгядян чоляхим.

Яьяли бяг: Аз тыни чич кардям?

Бо бозя асбиме.

Кубря ханым,

Бо шонякониме.


Аз бовя кардям ки, чямя нянон янядя ьызыля сыханон чы толыши дийонядя есятян бызнякясон щестин. Яве, ьялям бя дастя толыш явони чявон гявядя мясяжяьын, ряйря бяпей бынывышто! Фолклор – хяльи тарыхе! Ялялхусус, толыши фолклор ве ьядиме, ве рангине. Яве, ыштя тарыхмон зыне пидябу, бяпе ыштя хяльи фолклори гырдя быкямон, бяштя балон быроснямон. Бявядя ямя толыши милляти умри дыроз бякамон. Ящаштнимон ки, чямя хяльи пасня окышийо…

Забил


СУТДЯ МЯДОЪ



А чымы дус,

Тарсо “турус”!

Кагон лондя

Яъдящо лус!


Гяв дыре – оъ,

Вотдяш нымоъ.

Ща сыханыш

Чяй гыляй доъ!


Ай кяхяроб!

Хянихяроб!

Фик дойдям, - бяш

Сядя хяроб!


Сиплошя ло,

Ьыъня коло.

Тер быгятом

Бяшты боло!


Товбя быкя,

Щяни сякя.

Номердяти

Вясе, мякя!


Щар гяпы ду,

Сырафя лу.

Бяштя вотяй

Дойдяш ты зу!


Сипдо ливя

Асби гивя.

Бя ьырйят бой,

Хяль олывя!


Пози щяши,

Ъяьо мяши.

Жулуск быкя

Бя дим беши!


Чымы дивоъ,

Ай дылядоъ!

Бяшты горыш

Сутдя Мядоъ!

******

БЫДЯ БЯ МЯДОЪИ СЯДО



Есят зямоня ве йавяй,

Чымы дышмен чымы тявяй.

Чымы бобо йоля нявяй,

Яве йарям иъян хявяй.


Чичей чымы дарди ялож?

Дустон бочи ъяйдян ьырмож?

Охо чоко быкям ощож?

Бя номердон мандям мыщтож.


Дышмен ыштя зыняй кардя,

Бячымы ся хок екардя.

Вотдя, сойбы ышты мардя,

Номыш мандя, ыштян гардя.


Ковря хоки бя ся екям?

Бяки бывтом, чокня быкям?

Ын дардон аз чы жур сякям?

И кяс бямы нихо щякям.


Ща кяс жури ляйля ъяйдя,

Ща лывякяс “олим” бедя.

Мыни щяватедя, сяйдя,

Чяйо ныштя, фитво дойдя.


Бямы дусым вотя ляйин,

Чяйо вотдя явон вейин.

Шярыш кардя бомо хяйин,

Щямон ляйин бямы хяин.


Быряс бя имдоди, Хыдо!

Дешты номи бедям аз до!

Нощях ныбыро щяхи до!

Быдя бя Мядоъи сядо!

********

ЫШТЫ АЬЛИ КО НИ, БАЛЯ!



Виндям, пидя тынян быби

Йоля олим, зуманд, ьяби.

Оьо быби, быьят бя ги,

Нывыштей фигги рисаля,

Ышты аьли ко ни, баля!


Выъорядяш руъ дырози,

Ыштяку ты хяйли рози.

Де аьли мандиш бо пози,

Ын кардя ко, шя ро щяля,

Ышты аьли ко ни, баля!


Ыштяни ъоьо бардедяш,

Бывотон ты ко кардедяш.

Кяхоб, бочихо мардедяш!

Валлащ, пеьятя ын шяля

Ышты аьли ко ни, баля!


Зындяниш дуст-дышмен чичей,

Чоки ышты чяштя щичей.

Ышты шя рой охош пучей,

Кялля жяй, шохясо ляля,

Ышты аьли ко ни, баля!


Хяльы дяной чандя бя дас,

Дуй шедя-омедя няфяс.

Гушон окя дыйнян, бымяс, -

Нывыштяйон, - ын ъя маля,

Ышты аьли ко ни, баля!


Нощях кардяш лывош-лывош,

Ышты чяшдя щиче толыш!

Ай кяхяроб, войдяхо вош!

Факун дутей, йа кябала,

Ышты аьли ко ни, баля!


Аз бандим, ты гядя жохя,

Дыл-жигяры ышты пыхя.

Ряьы сутя, быны ляхя, -

Ося ьанде ын мясяля,

Ышты аьли ко ни, баля!


Щярзя мяби, щяни сякя!

Ашиш быманд, сыхан мякя!

Ын щянгомя, “мякя-быкя”

Мядоъ вотедя бярмаля

Ышты аьли ко ни, баля!

******

ДАРДОН ЛОНЯ ЖОНЫМ ВАЙ!



Ве гяпы ъяй, гяв бей кечя,

Дард-сярику дыл бя пучя.

Ща холядя са гыля хычя, -

Дардон лоня жоным вай!


Дард бявотен бо дард сойби,

Марде гоне бо мард сойби.

Рящмят омя бо пард сойби, -

Дардон лоня жоным вай!


Боки окям ыштя дыли,

Тяйли быкям бяняй выли.

Шир няведя муъня щыли, -

Дардон лоня жоным вай!


Ве мерд сойб ни ыштя номи,

Хуряк бябей дештя воми.

Биж няведя щеъ бо хоми, -

Дардон лоня жоным вай!


Кяй ъенышон чяй сун вотя,

Мердышонян кяй нун вотя.

Номердышон яйнун вотя, -

Дардон лоня жоным вай!


Банди димядяй чямя ди,

Щавзя чимян, марзяня щи.

Мядо, Менку мандя жойли, -

Дардон лоня жоным вай!


Во гятедя чы кяй куми,

Бяъей, мящаст мори думи!

Нощях бырдя щяхи туми, -

Дардон лоня жоным вай!


Товсони во гард вардедя,

Дышмен шойя щард кардедя,

Хывят мыни зард кардедя, -

Дардон лоня жоным вай!


Ве кядя йол есян бя ъен,

Тося кяйня щяхи бяъен?!

Дышмен зандя бомы пяъен, -

Дардон лоня жоным вай!


Отяш ъяйдям бя ляьы аз,

Щямро зындям вяряьи аз!

Сындынедям гый ряьи аз, -

Дардон лоня жоным вай!


Асб щурукдяй, ьяты сяоъ,

Ду вотедя щямро, дивоъ,

Бячяй горя вотдя Мядоъ: -

Дардон лоня жоным вай!

*****

ТОЛЫШИ ДЫВО-СЯНОН



Хыдо тыни хванди быко!

Хыдо бяшты вяляд авлоди рушт быдо!

Ты щич ащ ныкяшош!

Хыдо ышты ови сярин, нуни тат быко!

Бяшты боло ьыбон!

Шойя щарды быбо!

И бынош, да пегятош!

Хыдо ышты ъи дыроз быкя!

Рооны памбя быбо!

Хыдо бяшты дастон зу быдя!

Хыдо бяты бядя руъ нишо ныдя!

Хыдо ышты ели вар быкя!

Хыдо тыни хято-бялоку щифз быкя!

Хыдо ышты зывони кырт ныкя!

Хыдо тыни сябарз быкя!

Ышты вяйя пыло бящямон!

Йоля зоя быбуш!

Бяшты ангыя чяшон ьыбон!

Хыдо бяты зоя быдя!

Хыдо боты щич нийядя быросно!

Хыдо бяты дард нишо ныдя!

Хыдо ышты сядя игля му бя кам ныкя!

Хыдо бяты ныгыно!

Ыштя авлодон хяйри бывиндош!

Хуни-гуъды быбу, щани-щыт!

Ыштян даст быбош, ыштян йяхя!

*******

ТОЛЫШИ НЫФИНОН



Хыдо бяты ьяря быдя, нангыр ныдя!

Хыдо бяты чяш быдя, рушня ныдя!

Ышты йурдядя шяьол быбузо!

Ышты марди шыштеро ов бя дас ныво!

Ышты боло бя тер быгятом!

Ышты щардяй ышты вынийо бо!

Ышты жигяр лахтя-лахтя бяшты гяв ему!

Бяшты мафя сяй чярьяд дябасым!

Щышгя рингя быбош!

Ышты дастон чанг быбун!

Тыни данг быбуш!

Ышты пасня окышйо!

Бяшты ся отяш ему!

Ышты зывоня банд ечыко!

Хыдо тыни бя зямин быко!

Ышты пешт бя зямин быгыно!

Бяшты гяви лоля во быгыно!

Ышты щардяй ляктя быбо!

Бяшты довня зоя чумин ныгыно!

Ышты кя кумя быбо!

Ышты кя хо быбу!

Хыдо бяты дард быдя, дамон ныдя!

Бошты дарди лыьмонян чаря ныкя!

Тыни бя жывони бымардош!

Бя зоон дянырясш!

Бя киняй бымандош!