uzluga.ru
добавить свой файл
1
«МАСТОРАВА» - ЭРЗЯ РАСЬКЕДЕНТЬ ИНЕ ВАЛ

Ацамковонь 21 чистэнть - «Масторава» маралянь мороёвтамонть Чизэ.


Те эрзянь покшчинть кемекстызе 2-це Эрзянь Инекужось, кона ютась Саран ошсо 2006

иень чадыковонь 16 чистэнть. Инекужонь мельяволявтомасонть путозель-кемекстазель: - Эрзянский Конгресс… объявляет об учреждении Дня «Масторавы» - «Масторавань» Чи (21 декабря, чинь раштамочи), посвящёндого эпосу и истории народа».


«Масторава» мороёвтамось…


Ламо эрзянь ломанть содыть те Эрзя раськень ине валдонзо-ёвтамодонзо. Теке марто ламот, янксемакс, те шкас эйстэдензэ мезеяк тунь эзть марсеяк ды мезеяк а содыть. Секскак, весе валдо прев эрзянь ломантнень икеле ашти покш тев – содавтомс эрьва эрзянь ломаненть те эрзянь содамочинь эрьменть марто, конатась содавты ломаненть Эрзя раскень ютазь пингензэ ды эрямонь сюпавчинзэ марто

«Масторавась» Шарононь Сандра лелянть превензэ-кедензэ алдо лиссь ды путозель конёв лопас 1994 иестэ. «Мастораванть» ломанень сельме икелев лисемазо – инень ине путовкс Эрзя раськенть неень шкань эрямозонзо. Сонзэ питнезэ эрзятнень туртов а онкставикс.

ШАРОНОНЬ САНДРА

(ШАРОНОВ АЛЕКСАНДР МАРКОВИЧ) сёрмадоматевень-шкинемань докторось, «Масторава» ине морокерьксэнть пурныцясь-арсицясь, коряванзо корты истя:

««Масторава» ине морокерьксэсь – те Ине Вал-ёвтнема Эрзя раськеденть, Инешки Паздонть - Эрзя раськень теицядонть, мазый, чевте ойме Эрзянь Мастордонть, Эрзя раськень эрямо пингеденть, эрзянь маралятнеде-мараватнеде.
Эйсэнзэ минек покштятнень ине эрямост-тевест, раськенть ютазь пингезэ ды сы шкань эрямозо. Эйсэнзэ – эрзянь эрямось, кона панжови эрьва ломанентень.
Панжик лопанзо. Несак Эрзя раськенть валдонзо-мазычинзэ, сюпавдо сюпав оймензэ, косо эрить эрзянь ломантне Инешки Пазонть сельмензэ кедензэ ало.»

Кодамо лия кинигасто муят истят валт, Тюштя Инязоронть меремазо?
«- Эрзят!
Инешкинь эйдекс яла уледе!
Свал ансяк эрзянь кельсэ кортадо,
Свал ансяк эсенк превсэ эрядо,
Свал ансяк эрзянь мельсэ арседе,
Свал эсенк коенк-иланк ванстодо,
Свал эсенк ломанть прявтокс путнеде.
Сестэ а ёми Эрзянь Масторось…»

(«Масторава», 1994 ие, 488 лопаёнксось.)

Неть ды лият превей валтнэнь-мерематнень ловносыть ансяк «Масторавасто». Лиясо сынь косояк арасть. Ламо лезэв мелть-валт те ине моросонть. Пек ламо… Эрзятненень сынст содамка ды мельсэ-превсэ кирдемка, а стувтомка, эрямозонок совавтомка.
ЭРЗЯТ! Вешнеде, рамседе, казнеде лия ломаннень те эрзянь ине мороёвтамонть-морокерьксэнть!
"Масторавась" улемзэ эрьва эрзянь кудосо, эрьва эрзянь ломаненть кедьсэ-сельмсэ!

Сон нолдазель 1994 иестэ эрзянь кельсэ, седе мейле ютавтозель, мокшонь, рузонь ды мадьяронь(венгрань) кельс. Анокстави од нолдавкс эрзянь кельсэ. Косто рамамс «Мастораванть»: 430000 Республика Мордовия, г. Саранск, ул. Коммунистическая, дом 33, кор. 3, ком. 527. Тел. (8 834 2) 24 28 65. E-mail:erzia@moris.ru; http:www.erzia.saransk.ru/

Курок карматано тешкстамо «Масторава» мороёвтамонть Чинзэ. Ацамковсто, 21-це чистэнть. Те чистэнть чизэ рашты ды велявты кизэ ёнов. Кода ютавтомка тенек те эрзянь од покшчинть. Теде эряви тенек арсемс-теемс. Койсэм, васняяк те чинть совавтомка эрзянь кудос, эрзянь кудораськес. Пароль, кудонь покштнэ саевлизь те тевенть эсест кедьс. Тердевлизь эйкакшост-ласькест, ёвтневельть «Масторавадонть», ловновольть эсэнзэ сынсь ды максовольть ловномонзо пурнавозь раськест туртов. Азораватне паневельть-пидевельть те чинтень кодаткак эрзянь тантей ярсамкат-симемкат. Ды а стувтовольть кирвастемс эрзянь штатол Эрзя раськенть кисэ.

Пароль ютавтомс «Масторавань» ловномат эйдень кужова ды тонавткудова-школава. А эряви тень корява учомс, зярдо тердьсамизь кияк тов. Содатано, кияк эзэст тердеменек а карми. Секскак, сави тенек эстенек молемс шкастонзо сынст прявтнэнень ды кортамс мартост те тевенть. Кода тосо ютавтомс эрзянь покшчинть? Нама, ёвтнемс эйкакштэнень Эрзя раськеденть, «Масторавадонть», теемс ловнома пелькстамо, кие седе вадрясто ловны, кие седе ламо соды. Эйдень кужосо ды тонавткудосо тевс пароль нолдамс седямо-морамо плаштинетнень, косо сёрмадозь эрзянь морот. Пароль, эйкакштнэ анокставольть морынеть, ёвкскеть эрзянь кельсэ. Сесэ ламось тевс маштоволь…

А берянь улевель ютавтомс те чись тевшколасо ды тёкшколасояк. Студентнэ-тонавтницятне пек аламотне содыть «Масоравадонть». Прясонок-мельсэнек кирдемка, сынь зярыя иень ютазь теевить авакс-тетякс, кармить трямо-кастомо эйкакшт. Секскак сынесткак пек эряви «Масторавадонть» содамотне.

Кемкотовоце ие, кода «Масторавась» совась эрзянь эрямозонок. Неень шкань эрзятнень покш тевенек, совавтомс сонзэ эрьва эрзянь кудос. Те карми парсте лездамо тенек эрзянь раськенек ды эрзянь келенек ванстома тевсэнек.

Кундатано, эрзят, анокстамо ды ютавтомо «Масторавань» эрзянь покшчинть. Шканок анокстамонзо зярс ули. Кодат а кодат виенекак зярс улить.

Эрюш Вежай